1-1-70 
12:15 Блог Новости 
Од Марина Економу, вонреден професор по детска хематологија на Првата детска клиника на Аристотел Универзитет во Солун, раководител на Специјалниот центар за болести на крварење кај деца и адолесценти „Ипократио“ GHT
Кај многу пациенти со хемофилија, се применува редовна профилактичка терапија, односно давање на агенсот што недостасува во одредени денови во неделата, за да се избегнат епизоди на крварење. Без оглед на профилактичкиот третман на пациент со крварење, специфичните практики можат да придонесат за спречување на крварење – некои од нив се однесуваат на сите возрасти, а други за специфични возрасни групи.
Примена на општи мерки на претпазливост
Редовно вежбање: Вежбањето ги зајакнува мускулите и може да го намали ризикот од крварење во случај на повреда. Пливањето е одлична вежба бидејќи ги зајакнува сите мускулни групи без да го зголеми оптеретувањето на зглобовите.
Контрола на телесната тежина: Вишокот телесна тежина ги оптоварува зглобовите и го зголемува ризикот од крварење. Одржувањето на добра телесна тежина преку соодветна исхрана и редовно вежбање е многу важно за пациентите со вродени нарушувања на крварењето.
Орална хигиена: Доброто орално здравје го намалува ризикот од крварење. Се препорачува четкање заби двапати дневно, користење забен конец и пиење доволно флуорирана вода. Покрај тоа, потребно е редовно следење на забите за да се идентификуваат и третираат какви било повреди на забите или пародонтот навремено.
Примена на мерки на претпазливост според возраста
Доенчиња и мали деца: Потребна е строга примена на класични мерки на претпазливост за овие возрасти, како на пример поставување лента на креветот за бебињата за кога бебето е будно, поставување штитови на острите ивици на мебелот, поставување заштитни гелендери на скалите, поставување на теписи на подот каде игра бебето итн.
Се препорачува употреба на пластични и текстилни играчки и избегнување на дрвени или метални играчки, кои се потешки и можат да предизвикаат повреда.
Како што бебето почнува да ползи, а потоа почнува и со првите чекори, потребни се специјални заштитници на коленото и лактот, за да се спречи трауматска хемартроза. Бидејќи телесната тежина и висината брзо се менуваат на оваа возраст и со цел да се намалат трошоците за специјализирани комерцијални додатоци, се предлага на местата што одговараат на лактите и колената, да се направи внатрешен џеб на облеката на бебето, каде што се става бебешка пелена.
Се препорачува употреба на кациги кај деца кои се многу активни и авантуристични за да се намали ризикот од повреда на мозокот и мозочно крварење.
Училиште и адолесценција: Како што детето со хемофилија расте, добра е идејата да започне со учество во лекувањето на неговата болест. Така, во зависност од нивната возраст, децата првично можaт да помогнат, а потоа да го спроведат процесот на инфузија на анти-хемофиличниот агенс. Покрај психолошката корист од зајакнувањето на самодовербата кај младиот пациент, примената на оваа практика има огромна практична предност затоа што агенсот може да се даде рано во случај на повреда, каде и да се наоѓа пациентот – близу или далеку од неговото семејство.
Споделете го овој напис
